काठमाडौं । उज्यालो नेपाल पार्टीका तर्फबाट इन्जिनियर किरण केसीले काठमाडौं क्षेत्र नं. ७ बाट प्रतिनिधिसभा सदस्यका लागि उम्मेदवारी घोषणा गरेका छन् । मुलुकको दिगो विकास र समृद्धिका लागि युवा नेतृत्वको खाँचो रहेको उल्लेख गर्दै उनले निर्वाचनमा होमिएको बताएका हुन् ।
नैतिक नेतृत्व, पारदर्शी शासन, युवा सशक्तीकरण र प्रमाणमा आधारित नीति निर्माणलाई आफ्नो प्रमुख एजेन्डा बनाएका केसीले काठमाडौं क्षेत्र नं. ७ का जनताको सेवामार्फत नेपालको लोकतान्त्रिक, आर्थिक र सामाजिक विकासमा योगदान पुर्याउने लक्ष्य लिएका छन् ।
पेसाले मेकानिकल इन्जिनियर तथा व्यवसायीसमेत रहेका केसीले अष्ट्रेलियाबाट एमबीए अध्ययन पूरा गरी त्यहीँ व्यवसायमा सफल यात्रा तय गरेका थिए । तर देशप्रतिको जिम्मेवारी र केही गर्नैपर्छ भन्ने भावना लिएर आफू नेपाल फर्किएको उनले बताए । स्थानीय मतदाताबाट राम्रो साथ, समर्थन र हौसला पाएको दाबी गर्दै उनले निर्वाचन जित्नेमा पूर्ण विश्वास व्यक्त गरेका छन् ।
३१ वर्षे युवा उम्मेदवार केसीले निर्वाचन जितेपछि युवाहरूका लागि उदाहरणीय काम गर्ने र विदेशमा रहेका नेपालीलाई पनि नेपालमै सम्भावना छ भन्ने सन्देश दिन चाहेको बताए ।
चीन, थाइल्याण्ड, भियतनाम, भारत तथा अष्ट्रेलियामा उद्यमशीलता, पर्यटन विकास, नवप्रवर्तन र सांस्कृतिक आदान–प्रदानसँग सम्बन्धित विभिन्न कार्यक्रममा सहभागिता जनाइसकेका केसी २०७९ को संसदीय निर्वाचनमा स्वतन्त्र उम्मेदवारका रूपमा समेत प्रतिस्पर्धा गरिसकेका छन् ।
