काठमाडौँ । धादिङको बेनीघाट रोराङ गाउँपालिका–५ स्थित भैँसीगौडामा दुर्घटना भएको बसबाट एक जनालाई साढे ३ घण्टापछि उद्धार गरिएको प्रहरीले जनाएको छ ।
सोमबार बिहान पोखराबाट काठमाडौँ आउँदै गरेको ग.२ ख १४२१ नम्बरको यात्रुवाहक बस दुर्घटना हुँदा च्यापिएका २७ वर्षीय कृष्णराज मानन्धरलाई साढे ३ घण्टापछि जीवित उद्धार गरिएको धादिङका एसपी सुमित खड्काले बताए ।
ललितपुरको इमाडोल घर भएका मानन्धरलाई उपचारको लागि काठमाडौँ ल्याइएको छ । उनको ट्रमा सेन्टरमा उपचार भइरहेको एसपी खड्काले जानकारी दिए ।
खुट्टा च्यापिएर बसमा अड्किएका खड्कालाई सुरक्षाकर्मीले मेसिनले बसको भाग काटेर निकालेको हो । दुर्घटनामा परेर १९ जनाको मृत्यु भएको छ । घटना छानबिन गर्न गृह मन्त्रालयले कार्यदल गठन गरेको छ ।
