काठमाडौं, २७ जेठ । भारतीय क्रिकेट टिमका पूर्वकप्तान महेन्द्र सिंह धोनीलाई सोमबार २०२५ को लागि अन्तर्राष्ट्रिय क्रिकेट परिषद् (आईसीसी) हल अफ फेममा समावेश गरिएको छ । आईसीसीले सोमबार यो जानकारी दिएको हो ।
आईसीसीले आफ्नो हल अफ फेम २०२५ मा सात क्रिकेटरहरूलाई समावेश गरेको हो, जसमा पाँच पुरुष र दुई महिला क्रिकेटर समावेश छन् ।
हल अफ फेममा धोनीसहित पूर्व दक्षिण अफ्रिकी ब्याट्सम्यान हाशिम अमला, पूर्व अस्ट्रेलियाली ब्याट्सम्यान म्याथ्यू हेडेन, पूर्व दक्षिण अफ्रिकी कप्तान ग्रीम स्मिथ, न्यूजील्याण्डका पूर्व स्पिनर डेनियल भेट्टोरी, पाकिस्तानकी महिला टोलीकी खेलाडी साना मीर र इङ्गल्याण्डकी महिला टोलीकी खेलाडी सारा टेलर पनि समावेश छन् ।
धोनी आईसीसी हल अफ फेममा समावेश हुने भारतका ११ औं खेलाडी हुन् । धोनीभन्दा अगाडि नीतु डेभिड, वीरेन्द्र सहवाग, डियान एडुल्जी, विनोद मङ्कड, सचिन तेन्दुलकर, राहुल द्रविड, अनिल कुम्बले, कपिल देव, बिशन सिंह बेदी र सुनील गावस्करले यो सम्मान पाएका छन् । गावस्कर र बिशन सिंह बेदी आईसीसी हल अफ फेममा समावेश हुने भारतका सबैभन्दा जेठा खेलाडी हुन् । उनीहरूले २००९ मा यो सम्मान प्राप्त गरेका थिए ।
धोनीले अन्तर्राष्ट्रिय क्रिकेटबाट सन्यास लिएको करिब पाँच वर्ष भइसकेको छ ।
धोनीले भारतका लागि आफ्नो अन्तिम खेल २०१९ को एकदिवसीय विश्वकपको सेमिफाइनलमा खेलेका थिए । भारत त्यो खेल हारेको थियो र प्रतियोगिताबाट बाहिरिएको थियो । यसपछि, धोनीले भारतको लागि कुनै पनि खेल खेलेनन् र १५ अगस्ट २०२० मा अन्तर्राष्ट्रिय क्रिकेटबाट सन्यास लिएका थिए ।
क्याप्टेन कूलको नामले चिनिने धोनी भारतका सबैभन्दा सफल कप्तान मध्ये एक हुन् । धोनीले भारतलाई २००७ को टी २० विश्वकप, २०११ को एकदिवसीय विश्वकप र २०१३ को च्याम्पियन्स ट्रफीको उपाधि दिलाएका थिए । धोनी एक मात्र भारतीय कप्तान हुन् जसको कप्तानीमा भारतीय टोलीले तीनवटा आईसीसी उपाधि जितेको थियो ।
यसबाहेक, धोनीको नेतृत्वमा भारतले २०१०, २०१६ मा एसिया कपको उपाधि पनि जितेको थियो । धोनीले २००४ मा बंगलादेश विरुद्ध भारतको लागि डेब्यू गरेका थिए ।
