काठमाडौँ । विभिन्न जिल्लामा खोलाले बगाएर र डुबेर ३ जनाको मृत्यु भएको छ । जाजरकोट, पाल्पा र रुपन्देहीमा ३ जनाको मृत्यु भएको हो । जाजरकोटको छेडागाड नगरपालिका–५ स्थित छेडागाड खोलाले बगाएर सोही नगरपालिका–५ वडा बस्ने ५० वर्षीय अम्मर बहादुर शाहीको बुधबार साँझ मृत्यु भएको छ । नुहाउने क्रममा खोलाले बगाएर बेपत्ता भएका उनको उद्धार गरी उपचारको लागि नगर अस्पताल फुर्किचौर छेडागाड पठाएकोमा उपचारको क्रममा उनको मृत्यु भएको प्रहरीले जनाएको छ ।
त्यस्तै पाल्पाको माथागढी गाउँपालिका–२ सोले दोहोरा गाउँ बस्ने शङ्कर कुमालको २ वर्षीय छोरा सुगम कुमालको सोही ठाउँस्थित तालकुलोमा डुबेर बुधबार साँझ मृत्यु भएको छ । डुबेर अशक्त भएका उनको लुम्बिनी मेडिकल कलेज प्रभासमा थप उपचारको क्रममा मृत्यु भएको हो ।
उता रुपन्देहीको मर्चवारी गाउँपालिका–२ अमुवा बस्ने २६ वर्षीय सुग्रीम हरिजनको पनि पोखरीमा डुबेर बुधबार दिउँसो मृत्यु भएको छ । उनको आफ्नै घर नजिकै रहेको पोखरीमा डुबेर मृत्यु भएको हो । सबै घटनाका सम्बन्धमा प्रहरीले आवश्यक अनुसन्धान भइरहेको जनाएको छ ।
