काठमाडौँ, २८ साउन । प्रतिनिधिसभाको आजको बैठकमा सांसद रूपा सोशी चौधरीले कानुनतः मरिसकेकी गोमतीदेवी गिरी न्यायको खोजीमा हिँडेकी जनाउँदै उहाँलाई न्याय दिएर दोषीलाई कानुनी कारबाहीको दायरामा ल्याउन माग गर्नुभएको छ । बैठकको आकस्मिक समयमा उहाँले कञ्चनपुर जिल्ला भीमदत्त नगरपालिका–४ की गोमतीका श्रीमान्ले छ वर्षअघि निजको मृत्युदर्ता गरेकाले दोषीलाई कानुनी कारबाहीको दायरामा ल्याउन माग गर्नुभयो । छ वर्षपछि मात्र गोमतीदेवीले आफू मरिसकेको थाहा पाएकी थिइन् ।
“स्थानीय तहमा मुचुल्काबिना मृत्युदर्ता गर्न मिल्छ कि मिल्दैन?, अज्ञानताले भएको हो भने सच्याउनुपर्छ, नियत वा मिलेमतोमा गरिएको हो भने दोषीलाई कारबाही गर्नुपर्छ”, सांसद चौधरीले भन्नुभयो । जीवित पीडित गोमतीलाई न्याय दिन पनि उहाँले सरकारको ध्यानाकर्षण गराउनुभयो । सांसद प्रभु साहले कारागार किन सुरक्षित नभएको प्रश्न गर्दै मङ्गलबार वीरगञ्ज कारागारमा समयमा उपचार नपाएर कैदी राहुल साहको निधन भएको बताउनुभयो । कैलाली कारागारमा केही दिनअघि भरत चौधरीको मृत्यु भएको घटनाको जिम्मा कसले लिने भनी उहाँले सरकारको ध्यानाकर्षण गराउनुभयो । सांसद साहले आर्थिक अनियमितता, लेनदेनलगायत कारणले कारागारमा समस्या हुने गरेको बताउँदै यसमा सरकारको लापरबाहीले यस्तो घटना भएको आरोप लगाउनुभयो ।
जेललाई सुधार गृहमा लैजाने अभ्यास नभएकाले समस्या आउन थालेको उहाँको भनाइ छ । सांसद अम्बरबहादुर थापाले सरकारले भन्ने गरेको सुशासन कैलाली कारागारको घटनाले देखाएको बताउनुभयो । सरकारको सुरक्षा घेराभित्र रहेका कैदीकै सुरक्षा हुन सक्दैन भने अन्त कता सुरक्षा हुन्छ ? उहाँले प्रश्न गर्नुभयो । एक सय ५० कैदी राख्ने क्षमता भएको कारागारमा किन तीन गुणाभन्दा बन्दी राखिएको भन्दै उहाँले कैदीको सुरक्षाका लागि सरकारको ध्यानाकर्षण गराउनुभयो । सांसद हितराज पाण्डेले पाँच जना सांसदले बोलिसक्दा पनि संसद्भित्रको टेलिभिजनले काम नगरेकाले देखिने गरी व्यवस्था गराउन सभामुखको ध्यानाकर्षण गराउनुभएको थियो ।
