काठमाडौं, १० माघ । शुक्रराज ट्रपिकल तथा सरुवा रोग अस्पताल (टेकु अस्पताल)का निर्देशक डा युवानिधी बसौलाले आफूले सेवा विस्तार र शैक्षिक कार्यक्रम चलाउने लक्ष्य लिएको जानकारी दिएका छन् ।
अस्पतालले ९०औँ वार्षिकोत्सव मनाउने क्रममा उनले अस्पतालको गुणस्तरीय सेवा विस्तार र शैक्षिक कार्यक्रम चलाउने लक्ष्य लिएको जानकारी दिएका हुन् ।
एचआईभीको औषधिदेखि सर्पदंश, कोभिड, रेविजलगायतका औषधिसहित स्वास्थ्य सेवा दिँदै आएको अस्पतालको गुणस्तरीय सेवा प्रदान र विस्तारमा ध्यान दिने उनको भनाइ छ ।
टेकुमा निर्देशक बनेर आएको दुई महिनामात्र पुगेको जानकारी दिँदै उनले गुणस्तरीय स्वास्थ्य सेवामा ध्यान दिने बताए ।
शैक्षिक कार्यक्रमअनुसार स्टाफ नर्ससहितको कक्षा सञ्चालन गर्ने, विदेश जाने नेपालीलाई एउटै केन्द्रबाट भ्याक्सिन लगाउनेगरी काम गरिने जानकारी दिएका उनले औषधि उपलब्ध गराउने विषयमा पनि ध्यान दिएको जानकारी दिए ।
साथै गुरुयोजनाअनुसार ३०० बेडको सरुवारोग अस्पताल बनाउन शिलान्न्यास गरेर चाँडै निर्माण सम्पन्न गर्ने पनि लक्ष्य लिइएको उनको भनाइ छ ।
