अमेरिका । अमेरिकाका राष्ट्रपति डोनाल्ड ट्रम्पको प्रशासनले अमेरिकामा आफ्नो नीति पुस्तिका अद्यावधिक गरेको छ । अब ग्रिनकार्ड आवेदकहरू र अन्य संरक्षित आप्रवासीहरूलाई जारी गरिने वर्क परमिटको वैधता पाँच वर्षबाट घटाएर १८ महिनामा झारिएको छ ।
ह्वाइट हाउसनजिकै एक अफगानी नागरिकद्वारा दुई नेसनल गार्ड सदस्यलाई गोली हानिएको घटनाको एक हप्तापछि यो कदम चालिएको हो । यो कदमले शरणार्थी, आश्रय खोज्नेहरू र ‘स्टेटस समायोजन’ पर्खिरहेका आवेदकहरूलाई पनि असर गर्ने बताइएको छ ।
यूएस सिटिजनसिप एन्ड इमिग्रेसन सर्भिसेज (यूएससीआईएस)ले यो परिवर्तनले विदेशी नागरिकहरूको बारम्बार जाँच गर्न सम्भव हुने बताएको छ । यो कदमले लाखौँ मानिसहरूलाई असर गर्ने साथै वर्क परमिटको साथ आश्रय खोज्नेहरूमा निर्भर रहने मिट प्याकिङ उद्योगजस्ता कम्पनीहरूमा पनि प्रभाव पार्ने अमेरिकी अखबार वाल स्ट्रिट जर्नलले जनाएको छ ।
ट्रम्प प्रशासनले अध्यागमनलाई आफ्नो नीतिको केन्द्रमा राखेको छ । यस वर्षको अन्त्यसम्ममा ६ लाख मानिसलाई निर्वासित (देश निकाला) गर्ने लक्ष्य राखेको छ । हालसम्म करिब २० लाख मानिसले अमेरिका छाडिसकेका छन्, जसमा ५.३ लाख निर्वासन र १६ लाख स्वेच्छाले फर्कनेहरू समावेश छन् ।
धेरै डेमोक्रयाट–शासित सहरहरूमा संघीय अध्यागमन तथा भन्सार प्रवर्तन (आईसीई) एजेन्टहरूले आपराधिक आप्रवासीहरूलाई निशाना बनाइरहेका छन् । राजधानी वाशिंगटनमा पक्राउ गरिएका ८० प्रतिशत मानिसहरूको पहिले कुनै आपराधिक रेकर्ड नभएको वाशिंगटन पोस्टले जनाएको छ । अगस्ट ११ मा ट्रम्पले वाशिंगटनमा सार्वजनिक सुरक्षा आपतकाल घोषणा गरेका थिए । त्यसयता आईसीईले करिब ११ सय मानिसलाई हिरासतमा लिएको छ ।
