काठमाडौँ । प्रतिनिधिसभा निर्वाचन २०८२ को मतगणना जारी रहेका बेला नेकपा (एमाले) दोलखाका उम्मेदवार पार्वत गुरुङले मतदातालाई धन्यवाद दिने अभियान सुरु गरेका छन् ।
शनिबार जिरीमा पुगेर उनले मतदाता पुगेर धन्यवाद दिन सुरु गरेका हुन् । जारी मतगणनाको पछिल्लो तथ्याङ्कमा नेता गुरुङभन्दा राष्ट्रिय स्वतन्त्र पार्टीका जगदीश खरेल अगाडि छन् । नेता गुरुङले निर्वाचनको परिणामलाई सम्मान गर्ने र सधैँ दोलखाली जनताको हितमा समर्पित भएर काम गर्ने प्रतिबद्धता जनाउँदै मतदातालाई धन्यवाद दिन सुरु गरेका छन् ।
उनले निर्वाचनका क्रममा खट्ने पार्टीका नेता, कार्यकर्ता, समर्थक, शुभेच्छुक सबैप्रति आभार व्यक्त गरे । उनले भने, ‘जनताले व्यक्त गर्नुभएको मत लोकतन्त्रको सबैभन्दा ठुलो शक्ति हो। त्यसैले परिणाम जे आए पनि त्यो जनमतलाई हामी सम्मान गर्छौं। निर्वाचन सकिएपछि पनि म सधैँ जनतासँगै रहनेछु।’
यसैबिच स्थानीय बासिन्दाले निर्वाचनपछि मात्र नभई परिणाम आउनुअघि नै जनतामाझ पुगेर धन्यवाद व्यक्त गर्ने नेता गुरुङको पहलले जनमतप्रतिको सम्मान र जनतासँग निरन्तर सम्बन्ध कायम राख्ने सन्देश दिएको भन्दै प्रशंसा गरेका छन् ।
