काठमाडौं । ९० को दशकका असंख्य चर्चित बलिउड गीतका आवाज, प्रख्यात पार्श्व गायक अभिजीत भट्टाचार्य पहिलोपटक नेपालको मञ्चमा प्रस्तुति दिन तयार भएका छन् ।
‘लाइभ कन्सर्ट इन नेपाल– अभिजीत भट्टाचार्य’ आगामी जुन २० मा काठमाडौंको ठमेलस्थित क्लब नोभामा हुने भएको हो । साँझ ७ः०० बजे प्रवेशद्वार खुल्नेछ भने लाइभ कन्सर्ट ७ः३० बजेबाट सुरु हुनेछ ।
उनको कालजयी गीतहरू मै कोही यैसा गीत गाउँ, तुम दिल कि धड्कन मै, मेरे खयालोकी मल्लिका जस्ता हजारौं गीतहरू रहेका छन् ।
यस कन्सर्टको आयोजना नेपाल साङ्गीतिक संघले गरेको हो भने व्यवस्थापनको जिम्मा साधना कला केन्द्रले लिएको छ । यो कार्यक्रम बीबीटीएम फाउन्डेसनको हितमा आयोजित एक परोपकारी (च्यारिटी) कन्सर्ट हो ।
भारतका ए–क्लास सङ्गीतकारहरूको साथमा अभिजीतले आफ्ना कालजयी हिन्दी गीतका साथसाथै नेपाली श्रोताको मन छुने नेपाली गीतहरू पनि प्रस्तुत गर्नेछन्— जुन गीतहरू पुस्तौँदेखि सदाबहार बनेका छन् ।
कार्यक्रमको आधिकारिक टिकेटिङ पार्टनर सिटीपे हो, र अहिले अर्ली बर्ड टिकट बिक्री सुरु भइसकेको छ ।
अर्ली बर्ड अफरअन्तर्गत स्ट्यान्डिङ डान्सिङ फ्लोरको टिकट २,००० रुपैयाँ र स्ट्यान्डिङ भीआईपी फ्लोरको टिकट ४,००० रुपैयाँमा उपलब्ध छ– जुन नियमित मूल्यमा सीमित समयका लागि दिइएको छुट हो । यसका साथै भीभीआईपी, भीआईपी लगायतका टेबल प्याकेजहरू पनि उपलब्ध रहेको बताइएको छ ।
