भैरहवा । रुपन्देहीको कोटहीमाई गाउँपालिकाबाट भन्सार छली नेपालतर्फ ल्याउँदै गरेको साढे २० लाख रुपैयाँ बराबरका ३५ थान आईफोन र एउटा मोटरसाइकलसहित एक जनालाई प्रहरीले पक्राउ गरेको छ।
पक्राउ पर्नेमा रुपन्देहीको कोटहीमाई गाउँपालिका वडा नम्बर २ बस्ने ३६ वर्षीय पवन कुमार मुराव रहेका छन्।
प्रहरीले कोटहीमाई गाउँपालिका वडा नम्बर ५ बेनिनगरमा निजले चलाएको ‘यूपी ५३ डीएक्स ८८३८’ नम्बरको भारतीय मोटरसाइकललाई शङ्का लागेर जाँच गर्ने क्रममा भारतबाट भन्सार छली ल्याइएका विभिन्न मोडेलका ३५ थान आईफोन बरामद गरेको हो। बरामद गरिएका आईफोनहरूको अनुमानित मूल्य १९ लाख ७० हजार रुपैयाँ रहेको छ।
यस्तै पवनकुमारले चलाएको अनुमानित ८० हजार रुपैयाँ मूल्य बराबरको भारतीय मोटरसाइकलसमेत गरी जम्मा २० लाख ५० हजार रुपैयाँ बराबरको सामान बरामद गरिएको छ। प्रहरीले बरामद गरिएका आईफोन, मोटरसाइकल र चालक मुरावलाई नियन्त्रणमा लिएर घटनाबारे थप अनुसन्धान अघि बढाएको छ।
