काठमाडौं । मुक्तिनाथ विकास बैंकले नाइमा एक्स्पो अटो शो २०२६ लाई लक्षित गर्दै ५.५७ प्रतिशत ब्याजदरमा अटो लोन योजना सार्वजनिक गरेको छ।
बैंकका अनुसार योजनाअन्तर्गत आधार दरमा शून्य प्रतिशत थप गरी विशेष ब्याजदरमा सवारी साधन कर्जा उपलब्ध गराइने भएको हो । बैंकले ल्याएको यो योजना २०८३ साल भदौ मसान्तसम्म लागू हुनेछ। त्यसपछि भने बैंकको प्रचलित ब्याजदरअनुसार कर्जा सुविधा उपलब्ध हुने जनाइएको छ।
ग्राहकले कर्जाका लागि आवश्यक सम्पूर्ण कागजात तथा प्रक्रिया पूरा गरेको अवस्थामा २४ घण्टाभित्रै अटो लोन उपलब्ध गराउने व्यवस्था गरिएको बैंकले जनाएको छ। यसबाट नयाँ सवारी साधन खरिद गर्न चाहने ग्राहकलाई छिटो र सहज रूपमा कर्जा प्राप्त गर्न सहयोग पुग्ने बैंकको विश्वास छ ।
विशेष अटो लोन सुविधा देशभर रहेका बैंकका १७६ वटै शाखाबाट उपलब्ध हुनेछ । नाइमा एक्स्पो २०२६ मा सहभागी हुने तथा नयाँ सवारी साधन खरिद गर्ने योजना बनाएका ग्राहकले उक्त योजनाबाट लाभ लिन सक्नेछन्।
बैंकले ग्राहकको आवश्यकता तथा बजारको अवस्थालाई ध्यानमा राख्दै प्रतिस्पर्धी वित्तीय सेवा उपलब्ध गराउँदै आएको जनाएको छ। नयाँ सवारी साधन खरिदलाई सहज बनाउने उद्देश्यले ल्याइएको यो योजनाले ग्राहकलाई थप वित्तीय सुविधा प्रदान गर्ने बैंकको अपेक्षा छ।
