काठमाडौं । स्वास्थ्य सेवा तथा चिकित्सा शिक्षाका विषयमा लामो समयदेखि सक्रिय रहँदै आएका वरिष्ठ नाक, कान तथा घाँटीरोग विशेषज्ञ डा. ढुन्डिराज पौडेल नेपाल मेडिकल काउन्सिलको अध्यक्षमा नियुक्त भएका छन्।
स्वास्थ्य तथा खाद्य स्वच्छता मन्त्री निशा मेहताले बुधबार डा. पौडेललाई काउन्सिलको अध्यक्षमा नियुक्त गरेकी हुन्।
डा. पौडेल यसअघि भरतपुर अस्पताल विकास समितिको अध्यक्षका रूपमा कार्यरत थिए। उक्त जिम्मेवारीमा रहँदा उनले भरतपुर अस्पताललाई चिकित्सा शिक्षा प्रदान गर्ने शिक्षण अस्पतालका रूपमा विकास गर्नुपर्ने अवधारणा अघि सारेका थिए।
सरकारी अस्पताललाई थप सक्षम बनाउँदै स्वास्थ्य सेवा र चिकित्सा शिक्षालाई एउटै संस्थागत संरचनाबाट प्रभावकारी रूपमा अघि बढाउनुपर्ने धारणा राख्दै आएका पौडेलले भरतपुर अस्पताललाई राष्ट्रिय चिकित्सा विज्ञान संस्थानको स्वरूपमा विकास गर्नुपर्ने विचारसमेत सार्वजनिक गरेका थिए।
अब मेडिकल काउन्सिलको नेतृत्वमा पुगेपछि चिकित्सकीय पेशाको नियमन, चिकित्सकको व्यावसायिक आचरण, परीक्षा तथा चिकित्सा शिक्षासम्बन्धी विषयमा उनले महत्वपूर्ण भूमिका निर्वाह गर्नुपर्नेछ।
डा. पौडेलले त्रिभुवन विश्वविद्यालय, चिकित्सा शास्त्र अध्ययन संस्थानबाट एमबीबीएस तथा नाक, कान तथा घाँटी शल्यचिकित्सामा एमएस गरेका छन्। उनी नेपाल मेडिकल काउन्सिलको नैतिकता तथा परीक्षा समितिमा कार्यकारी सदस्य तथा समन्वयकर्ताका रूपमा समेत काम गरिसकेका छन्।
