काठमाडौं । नेपाली दुग्धजन्य उत्पादनलाई अन्तर्राष्ट्रिय बजारमा पुर्याउने प्रयासस्वरूप सरकारी स्वामित्वको दुग्ध विकास संस्थान (डीडीसी)ले पहिलोपटक आफ्नो घ्यू दुबई निर्यात गरेको छ ।
डीडीसीले शुक्रबार ६ सय किलो घ्यू दुबई पठाएको हो । दुबईमा रहेका नेपाली उपभोक्तालाई लक्षित गर्दै सुरु गरिएको यो निर्यातलाई संस्थानले प्रारम्भिक बजार परीक्षणका रूपमा लिएको छ ।
डीडीसीले दुबईमा घ्यू बिक्रीका लागि रातो र चन्द्र–सूर्य इन्टरनेसनलसँग सम्झौता गरेको छ । पहिलो चरणमा त्यहाँका विभिन्न बिक्रेतामार्फत घ्यूको बिक्री परीक्षण गरिनेछ । बजारमा माग कस्तो हुन्छ भन्ने आधारमा आगामी दिनमा निर्यातको मात्रा बढाउने तयारी डीडीसीको छ ।
डीडीसीका प्रबन्ध निर्देशक प्रकाशचन्द्र घिमिरेका अनुसार पहिलो खेपका रूपमा पठाइएको घ्यू विभिन्न बिक्रेतामार्फत परीक्षणका रूपमा बिक्री गरिनेछ । माग बढेमा नियमित रूपमा ठूलो परिमाणमा निर्यात गर्ने योजना रहेको उनले बताए ।
नेपाली उत्पादनको विदेशमा प्रचार गर्ने उद्देश्यले पहिलो खेप हवाई मार्गबाट पठाइए पनि आगामी दिनमा लागत घटाउन भारत हुँदै कन्टेनरमार्फत घ्यू पठाउने तयारी भइरहेको छ ।
डीडीसीले दुबईलाई मात्रै लक्षित नगरी मध्यपूर्वका अन्य मुलुकमा समेत आफ्ना घ्यू तथा अन्य दुग्धजन्य उत्पादनको बजार विस्तार गर्ने योजना बनाएको छ । संस्थानका अनुसार प्रारम्भिक बजार परीक्षण सफल भएमा नेपाली दुग्धजन्य उत्पादनको अन्तर्राष्ट्रिय बजार विस्तार हुने अपेक्षा गरिएको छ ।
