काठमाडाै । किसानको बक्यौता घटाउँदै आएको दुग्ध विकास संस्थान (डीडीसी)ले दैनिक एक लाख ५० हजार लिटर दूध सङ्कलन गर्ने लक्ष्य अघि सारेको छ। हाल ६५ हजार लिटर दूध सङ्कलन गर्दै आएको डीडीसीले सङ्कलन केन्द्र र बिक्री सञ्जाल विस्तार गरी थप ८५ हजार लिटर दूध सङ्कलन गर्ने योजना बनाएको हो।
डीडीसीका महाप्रबन्धक डा. शरणकुमार पाण्डेका अनुसार चार महिनाअघि किसानलाई तिर्न बाँकी करिब ७२ करोड घटेर अहिले २० करोड रुपैयाँमा झरेको छ। यस अवधिमा करिब ७० करोड रुपैयाँ भुक्तानी गरिएको उनले बताए । काठमाडौंमा दूध बिक्रीसमेत दैनिक ६० हजारबाट बढेर ७२ हजार लिटर पुगेको छ।
डीडीसीले आन्तरिक बजारसँगै विदेशमा समेत उत्पादन बिक्री विस्तार थालेको छ। दुबईमा घ्यू निर्यात सुरु भइसकेको र दक्षिण कोरिया, मलेसिया तथा जापानमा चिज, पेडालगायत उत्पादन निर्यातका लागि छलफल भइरहेको पाण्डेले बताए।
करिब एक अर्ब २६ करोड रुपैयाँ ऋण रहेको संस्थानले आगामी एक वर्ष ६ महिनाभित्र ऋण चुक्ता गर्ने लक्ष्यसहित खर्च नियन्त्रण र वित्तीय सुधारलाई अघि बढाएको जनाएको छ।
