वासिङ्टन डीसी । अमेरिकी प्रशासनले केही देशलाई रुसबाट सीमित मात्रामातेल खरिद गर्न अस्थायी अनुमति दिएको छ । राष्ट्रपति डोनाल्ड ट्रम्प नेतृत्वको प्रशासनले बिहीबार यस्तो नयाँ लाइसेन्स जारी गरेको हो । अमेरिकी अर्थ मन्त्री स्कट बेसेन्टका अनुसार विश्व बजारमा तेल आपूर्ति बढाउने उद्देश्यले समुद्रमा अड्किएका रुसी तेल ढुवानीलाई बिक्री गर्न अस्थायी अनुमति दिइएको हो ।
यो छोटो अवधिको र सीमित अनुमति मात्र भएको उनले सामाजिक सञ्जालमार्फत भनेका छन् । रुसको ऊर्जा राजस्वको मुख्य हिस्सा तेल निकाल्ने क्रममा लगाइने करबाट आउने भएकोले यसले रुस सरकारलाई ठुलो आर्थिक फाइदा नपुग्ने उनको भनाइ छ ।
अमेरिकी अर्थ मन्त्रालयले जारी गरेको लाइसेन्स अनुसार मार्च १२ सम्म जहाजमा लोड भइसकेको रुसी कच्चा तेल वा पेट्रोलियम पदार्थ मात्र यो नियम अन्तर्गत पर्नेछ । ती तेल अप्रिल ११ सम्म बिक्री वा आपूर्ति गर्न अनुमति दिइएको छ ।
यसैबिच इरानसँगको युद्धका कारण विश्व ऊर्जा बजारमा दबाब बढेको छ । पश्चिम एसियास्थित स्ट्रेट अफ होर्मुज बन्द जस्तै भएपछि यो मार्ग भएर ढुवानी हुने विश्वको करिब २० प्रतिशत तेल आवतजावत प्रभावित भएको छ ।
युद्ध लम्बिँदै जाँदा अन्तर्राष्ट्रिय बजारमा तेलको मूल्य तीव्र रूपमा बढेको छ । ब्रेन्ट क्रूड तेलको मूल्य हालैका दिनमा १०० डलर प्रति ब्यारेलभन्दा माथि पुगेको छ । युद्ध छिट्टै सकिए पनि स्ट्रेट अफ होर्मुजको मार्ग तत्काल खुल्ने सम्भावना कम रहेको चेतावनी विश्लेषकहरूले दिएका छन् ।
