सप्तरी : सप्तरी प्रहरीले ११ वर्षअघि एक व्यक्तिको अपहरणपछि हत्या गरेको आरोपमा लामो समयदेखि फरार रहेका दुई जनालाई पक्राउ गरेको छ। जिल्ला प्रहरी कार्यालय सप्तरीले अपहरण गरी मारेको कर्तव्य ज्यान मुद्दामा संलग्न रहेको आरोपमा उनीहरूलाई पक्राउ गरेको हो।
पक्राउ पर्नेमा सप्तरीको सुरुङ्गा नगरपालिका–९ बस्ने ६९ वर्षीय दाउद मियाँ र सिरहाको लहान नगरपालिका–१९ बस्ने ६० वर्षीय नासिर भन्ने बसिर मियाँ रहेका छन्। दाउदलाई सुरुङ्गा–९ बाट जेठ २४ गते र नासिरलाई सप्तरीकै बलानबिहुल गाउँपालिका–१ बाट जेठ ३१ गते पक्राउ गरिएको प्रहरीले जनाएको छ।
प्रहरीका अनुसार २०७२ साल भदौ २९ गते राति करिब ७ बजे सुरुङ्गा नगरपालिका–९ बस्ने जाहेरवाला रोशन खातुनका ससुरा एनुल मियाँलाई उनीहरूकै समूहले अपहरण गरेको थियो। आफ्नै घरमा बसिरहेको अवस्थामा एनुललाई अपहरण गरी बलान खोलादेखि पूर्वतर्फ रहेको पैनीको बाटोमा लगेर पानीमा डुबाई तथा मुख थुनेर हत्या गरिएको प्रहरी विज्ञप्तिमा उल्लेख छ।
उक्त घटनालगत्तै आरोपीहरू फरार भएका थिए। लामो समयदेखि लुकिछिपी बस्दै आएका उनीहरूलाई निरन्तरको खोजतलासपछि पक्राउ गर्न सफल भएको प्रहरीले जनाएको छ। जिल्ला प्रहरी कार्यालय सप्तरीका प्रवक्ता तथा प्रहरी नायब उपरीक्षक हेमराज घिमिरेका अनुसार पक्राउ परेका दुवै जनालाई सप्तरी जिल्ला अदालत राजविराजबाट म्याद थप गरी आवश्यक अनुसन्धान अघि बढाइएको छ।
