वीरगन्ज । मधेस प्रदेशको एकमात्र महानगरपालिका वीरगन्ज महानगरपालिकाले आगामी आर्थिक वर्ष २०८३/०८४ का लागि चालु आर्थिक वर्षको तुलनामा ७३ करोड रुपैयाँ बढीको बजेट प्रस्तुत गरेको छ ।
महानगरपालिकाले बुधबार आयोजित २०औँ नगर अधिवेशनमा चालु आवको तुलनामा १६.५५ प्रतिशतले बढी अनुमानित आय–व्यय सार्वजनिक गरेको हो ।
चालु आर्थिक वर्षका लागि महानगरपालिकाले १९औँ नगर अधिवेशनमार्फत तीन अर्ब ६९ करोड १२ लाख ४६ हजार रुपैयाँको अनुमानित बजेट प्रस्तुत गरेको थियो । आगामी आर्थिक वर्षका लागि भने ४ अर्ब ४२ करोड ३४ लाख ६८ हजार रुपैयाँको अनुमानित आय–व्यय प्रस्तुत गरिएको छ ।
कार्यवाहक नगरप्रमुख इम्तियाज आलमको अध्यक्षतामा सम्पन्न नगर अधिवेशनमा वडा नं. ४ का अध्यक्ष जगत साह कानुले आगामी आर्थिक वर्षका लागि चालुतर्फ ५४.३ प्रतिशत, पुँजीगततर्फ ४४.६ प्रतिशत तथा वित्तीय व्यवस्थापनतर्फ १.१ प्रतिशत बजेट विनियोजन गरिएको जानकारी दिए ।
उनका अनुसार चालुतर्फ २ अर्ब ४० करोड ३४ लाख ८५ हजार रुपैयाँ, पुँजीगततर्फ १ अर्ब ९६ करोड ९९ लाख ८४ हजार रुपैयाँ तथा वित्तीय व्यवस्थापनतर्फ ५ करोड रुपैयाँ विनियोजन गरिएको छ ।
नगर अधिवेशनलाई सम्बोधन गर्दै उनले चालु आर्थिक वर्षमा हालसम्म ५८.५ प्रतिशत बजेट खर्च भएको तथा आर्थिक वर्षको अन्त्यसम्ममा ६५ प्रतिशत खर्च हुने अनुमान रहेको जानकारी दिए ।
आगामी आर्थिक वर्षका लागि प्रस्तुत गरिएको बजेटका प्रमुख स्रोतहरूमा संघीय अन्तरसरकारी वित्तीय हस्तान्तरणबाट १ अर्ब ९८ करोड २९ लाख रुपैयाँ, संघीय राजस्व बाँडफाँटबाट २४ करोड ६८ लाख ८३ हजार रुपैयाँ, प्रदेश अन्तरसरकारी वित्तीय हस्तान्तरणबाट ५ करोड २८ लाख रुपैयाँ, प्रदेश राजस्व बाँडफाँटबाट १ करोड ६७ लाख १४ हजार रुपैयाँ, घरजग्गा रजिस्ट्रेसन शुल्कबाट ४५ करोड रुपैयाँ, आन्तरिक राजस्वबाट १ अर्ब ४८ करोड रुपैयाँ, गत वर्षको नगद मौज्दातबाट ४ करोड ६९ लाख ४४ हजार रुपैयाँ तथा नगर विकास कोषबाट १५ करोड रुपैयाँ व्यवस्थापन गरिने जानकारी दिइयो ।
आगामी आर्थिक वर्षका लागि प्रस्तुत गरिएको बजेटमा स्वास्थ्य, शिक्षा, पूर्वाधार विकास, विपद् व्यवस्थापन तथा वातावरण संरक्षणलाई प्राथमिकता दिइएको छ ।
साथै, स्वरोजगार प्रवद्र्धन, सहर सौन्दर्यीकरण तथा जलवायु परिवर्तनका नकारात्मक प्रभाव न्यूनीकरणका लागि विभिन्न कार्यक्रम र योजनाहरू समावेश गरिएका छन्। कार्यक्रममा कार्यवाहक नगरप्रमुख आलमले आगामी आर्थिक वर्षका लागि नीति तथा कार्यक्रम प्रस्तुत गर्दै सरसफाइ, फोहोर व्यवस्थापन, स्वास्थ्य तथा शिक्षालाई विशेष प्राथमिकता दिइएको बताए ।
उनले खानेपानी संकट समाधान, सिर्सिया खोलाको व्यवस्थापन, पूर्वाधार विकासलाई तीव्रता तथा पर्यटन प्रवद्र्धनलाई समेत प्राथमिकतामा राखिएको जानकारी दिए । महानगरलाई व्यवस्थित, स्वच्छ र दिगो विकासको मार्गमा अघि बढाउने लक्ष्यसहित नीति तथा कार्यक्रम ल्याइएको उनको भनाइ थियो।
