काठमाडौं । भोटेकोशी नदीमा आएको विनाशकारी बाढीबाट प्रभावित नागरिकको उद्धार तथा पुनःस्थापनाका लागि बूढानीलकण्ठ नगरपालिकाले ५५ लाख ५५ हजार ५५५ रुपैयाँ सहयोग गर्ने भएको छ।
नगरपालिकाको ९३औँ तथा आकस्मिक नगर कार्यपालिका बैठकले प्रधानमन्त्री दैवी प्रकोप उद्धार कोषमा उक्त रकम जम्मा गर्ने निर्णय गरेको हो। जनप्रतिनिधि, कर्मचारी तथा नगरपालिकाको विपद् व्यवस्थापन कोषबाट रकम जुटाइने नगरपालिकाले जनाएको छ।
तर, नगरपालिकाले आर्थिक सहयोगमा मात्र सीमित नरही प्रत्यक्ष उद्धार र उपचारलाई समेत प्राथमिकता दिएको छ। प्रभावित क्षेत्रबाट उद्धार गरिएका नागरिकलाई स्वास्थ्यकर्मीसहितको एम्बुलेन्समार्फत अस्पताल पुर्याउने तथा आवश्यक परे नगर प्रहरीको नेतृत्वमा प्रभावित नागरिकलाई काठमाडौं ल्याउने व्यवस्था गर्ने निर्णय गरिएको छ।
त्यस्तै, घाइतेको उपचारमा रगत अभाव हुन नदिन नगरपालिकाका सबै वडामा रक्तदान कार्यक्रम सञ्चालन गर्ने तथा खाद्यान्नलगायत राहत सामग्री संकलन गरी एकद्वार प्रणालीमार्फत वितरण गर्ने निर्णयसमेत भएको छ।
नगरपालिकाले विपद्को यस घडीमा निजी क्षेत्र, संघ–संस्था, नगरवासी तथा आम नागरिकलाई समेत सहयोगका लागि आह्वान गरेको छ।
