काठमाडौँ । नेपाली कांग्रेसका महामन्त्री गगन थापाले पार्टीको १५ औँ महाधिवेशन मङ्सिरभित्र हुने गरी कार्यतालिका केन्द्रीय कार्यसमितिमा नआए विशेष महाधिवेशन बाध्यता हुने बताएका छन् । केन्द्रीय कार्यसमितिको पार्टी कार्यालय सानेपामा बसेको बैठकमा एजेन्डा पेस गर्दै महामन्त्री थापाले विशेष महाधिवेशन माग गर्नेहरू पनि मङ्सिर मसान्तभित्र नियमित महाधिवेशन होस् भन्ने चाहना राख्ने बताए ।
थापाले बैठकमा कार्यसम्पादन समितिले तय गरेका ८ एजेन्डा पेस गरेका छन् । एजेन्डा पेस गर्दै थापाले विशेष महाधिवेशन माग गर्दै दर्ता भएको पत्रमा विधानबमोजिम आवश्यक अध्ययन गरेर प्रक्रिया अगाडि बढाइने बताए । ‘विशेष महाधिवेशनको लागि विधानमा व्यवस्था भएबमोजिम पार्टीमा महाधिवेशनको माग राख्दै हस्ताक्षर बुझाउनुभएको छ ।
यो दर्ता भएको पत्रमा विधानबमोजिम आवश्यक अध्ययन गरेर प्रक्रिया अगाडि बढाइनेछ,’ थापाले बैठकमा भने, ‘तर, मलाई विश्वास छ, विशेष अधिवेशनका माग कर्ता साथीहरूले मङ्सिर मसान्तभित्रमा नियमित अधिवेशन हुनुपर्छ भन्ने विषय मुख्य हो भन्नुभएकाले यो बैठक टुङ्गिने बेलासम्म हामी नियमित महाधिवेशन समयमै गर्ने समझदारीमा पुग्ने छौँ ।’
उनले नियमित महाधिवेशनको कार्यतालिका आएमा विशेष महाधिवेशनको बहस सकिनेसमेत बताए । केन्द्रीय कार्यसमिति बैठकले नियमित महाधिवेशनको कार्यतालिका पास गर्ने थापाको भनाइ थियो । महामन्त्री थापाले नियमित महाधिवेशनको कार्यतालिका आएपछि समझदारीमा विशेष महाधिवेशन आवश्यक नभएको निर्णय हुने बताए । ‘नियमित महाधिवेशनको कार्यतालिका आएपछि विशेष महाधिवेशन आवश्यक नरहेको निर्णयमा हामी पुग्नेछौँ,’ थापाले भने ।
