काठमाडौं : सर्वोच्च अदालतले नेकपा एमालेका उपाध्यक्ष तथा पूर्वउपप्रधानमन्त्री विष्णु पौडेलसँग जोडिएको बन्दीप्रत्यक्षीकरण रिटमा गम्भीर चासो देखाउँदै विशेष अदालतमा विचाराधीन सम्पत्ति शुद्धीकरण मुद्दाको सक्कल मिसिल झिकाउन आदेश दिएको छ।
न्यायाधीशद्वय टेकप्रसाद ढुङ्गाना र मेघराज पोखरेलको इजलासले सोमबार उक्त आदेश जारी गरेको हो। पौडेलकी पत्नी दोमाया पौडेलले दायर गरेको बन्दीप्रत्यक्षीकरणको रिटमाथि सुनुवाइ गर्दै अदालतले सुलभ अग्रवाल र दीपक भट्ट प्रतिवादी रहेको सम्पत्ति शुद्धीकरण मुद्दाका सम्पूर्ण तथ्य र प्रमाणहरूको विस्तृत अध्ययनका लागि मिसिल मगाउने निर्णय गरेको छ।
अदालतको आदेशअनुसार विशेष अदालतबाट आउने मिसिलमा रहेका कागजात, प्रमाण र मुद्दासँग सम्बन्धित अन्य विवरणहरूको गहन अध्ययनपश्चात् मात्र रिटमाथिको थप सुनुवाइ प्रक्रिया अघि बढ्नेछ।
विशेष अदालतमा विचाराधीन रहेको उक्त मुद्दा र बन्दीप्रत्यक्षीकरणको रिट निवेदनमा उठाइएका विषयहरू अन्तरसम्बन्धित रहेको निष्कर्ष निकाल्दै सर्वोच्चले न्यायिक निरूपणका लागि सक्कल फाइल नै आवश्यक रहेको ठहर गरेको हो।
