हैदराबाद । हैदराबादबाट बेंगलुरु जाँदै गरेको यात्रुवाहक बसमा आगलागी हुँदा कम्तीमा १० जनाको मृत्यु भएको छ भने धेरै यात्रुहरू गम्भीर घाइते भएका छन्। यो दुर्घटना शुक्रबार बिहान कुर्नूल जिल्लाको चिन्ना टेकुरु गाउँ नजिकै भएको हो। आगलागीका कारण बस पूर्ण रूपमा क्षति भएको छ।
दुर्घटना हुँदा बसमा करिब ४२ जना यात्रु सवार थिए। केही घाइतेहरूको अवस्था गम्भीर रहेकाले मृतकको सङ्ख्या बढ्न सक्ने आशङ्का छ। प्रारम्भिक अनुमानअनुसार, एउटा मोटरसाइकल बससँग ठोक्किएर तेलको ट्याङ्कीमा ठोक्किएको र त्यसपछि आगलागी भएको हुनसक्छ। यद्यपि, स्थानीय प्रशासनले अहिलेसम्म आधिकारिक कारण पुष्टि गरेको छैन।
मुख्यमन्त्री चन्द्रबाबु नायडूले दुर्घटनाप्रति दुःख व्यक्त गर्दै घाइते र प्रभावित परिवारहरूलाई सबै सम्भव सहयोग गर्ने बताएका छन्। कुर्नूल रेन्जका डीआईजी कोया प्रवीणका अनुसार दुई बालबालिका र दुई चालकसहित करिब १९ यात्रुहरू दुर्घटनाबाट बाँचेका छन्। प्रहरीका अनुसार, सर्ट सर्किटले गर्दा बसको ढोका जाम भयो र केही मिनेटमै गाडी पूर्ण रूपमा जल्यो। बाँचेका धेरैजसो यात्रुहरू २५ देखि ३५ वर्ष उमेर समूहका रहेका छन्।
