काठमाडौँ । ऊर्जा, जलस्रोत तथा सिँचाइमन्त्री विराजभक्त श्रेष्ठले भोटेकोशी बाढीले आगामी दिनमा जलवायु अनुकूलनयुक्त संरचना निर्माणमा जोड दिनुपर्ने पाठ सिकाएको बताएका छन् । मंगलबार सिंहदरबारस्थित मन्त्रालयमा स्वतन्त्र ऊर्जा उत्पादकहरूको संस्था (इप्पान) का पदाधिकारीहरूसँगको छलफल तथा सहयोग हस्तान्तरण कार्यक्रममा बोल्दै उनले यस्तो बताएका हुन् ।
जलवायुजन्य विपद्को सामना गर्नसक्ने र भौगोलिक बनावटलाई समेत मध्यनजर गरेर पूर्वाधार निर्माण गर्नुपर्ने अबको आवश्यकता रहेको उनले औंल्याए । भोटेकोशी–त्रिशूली करिडोरको भौगोलिक बनावट र प्रतिकूल मौसमी अवस्थाका कारण विपद्को जोखिम उच्च रहेको उल्लेख गर्दै मन्त्री श्रेष्ठले देशका अन्य मुख्य करिडोरमा पनि यस्तै बाढी आए ठूलो क्षति हुन सक्ने चेतावनी दिए ।
अब पूर्वाधार निर्माण गर्दा जलवायु परिवर्तनका सम्भावित प्रभावलाई पूर्वानुमान गरी सोहीअनुसार संरचना बनाउनुपर्ने उनको भनाइ छ । विपद्का समयमा इप्पानले सरकारसँग गरेको समन्वय र सहकार्यको प्रशंसा गर्दै उनले नीतिगत सुधार र भविष्यका सम्भावनाको खोजीमा समेत सहकार्य आवश्यक रहेको प्रष्ट पारे ।
विपद्को समयमा सबै पक्ष एकजुट भएको सन्देश राष्ट्रिय तथा अन्तर्राष्ट्रिय स्तरमा दिनुपर्नेमा समेत उनको जोड छ । सरकारले जलविद्युत् आयोजनाका सुरुङमा फसेका नागरिकको खोज तथा उद्धारलाई प्राथमिकतामा राखेको उल्लेख गर्दै उनले विपद्का बेला राज्यको व्यवहार सबैप्रति समान रहेको दाबी गरे ।
कार्यक्रममा उनले भने, ‘जलवायु परिवर्तनको असरका कारण भोटेकोशी–त्रिशूली करिडोरमा जे भयो, हाम्रा अन्य मुख्य करिडोरमा यस्तो भएको भए कस्तो क्षति हुन्थ्यो होला ? त्यहाँको भौगोलिक बनावट र परिस्थिति नै त्यस्तै छ, प्राकृतिक मौसमको प्रतिकूलता पनि निकै चुनौतीपूर्ण छ । त्यसकारण अब पूर्वाधार निर्माण गर्दा जलवायु अनुकूलन संरचनादेखि सबै कुरामा पुनर्विचार गर्नुपर्ने ठाउँमा हामी आइपुगेका छौं । यस विपद्को घडीमा इप्पानले जसरी समन्वय र सहकार्य गरेको छ, त्यसका लागि म धन्यवाद दिन चाहन्छु । हामीबीच वैचारिक भिन्नता हुन सक्छन् तर यो अवस्थामा हामी सबै सँगै छौं भन्ने सन्देश राष्ट्रिय स्तरमा मात्र नभई अन्तर्राष्ट्रिय जगत्लाई पनि जानेछ ।’
विपद् आउनुमा कसैको हात नभए पनि यसपछिको खोज, उद्धार र राहत वितरणमा हुने समन्वय तथा सहकार्य निकै महत्त्वपूर्ण हुने धारणा उनले राखे । विपद्का बेला निजी क्षेत्र नभनी राज्यले समान व्यवहार गरेको र सरकार सबैको साथमा छ भनेर आश्वस्त पार्न आफूहरू सफल भएको उल्लेख गर्दै उनले नागरिकलाई सरकार सँगै छ भन्ने विश्वास दिलाउन सकेको दाबी समेत गरे ।
