भक्तपुर, २८ असोज । लामो समयदेखि जग्गाको अभावमा आफ्नै प्रशासनिक भवन निर्माण गर्न नसकेको सूर्यविनायक नगरपालिका–१ सिरुटारको समस्या समाधानतर्फ अघि बढेको छ। स्थानीय राउत परिवारले पाँच आना जग्गा उपलब्ध गराएपछि वडा कार्यालयको साढे चारतले भवन निर्माण सुरु भएको हो।
नगरप्रमुख बासुदेव थापाले बुधबार एक कार्यक्रमबीच भवनको शिलान्यास गर्नुभयो। करिब दुई करोड ४० लाख रुपैयाँको ठेक्का सम्झौताअनुसार निर्माण हुन लागेको भवन अपाङ्गमैत्री तथा बालमैत्री बनाइनेछ।
नगरपालिकाका पूर्वाधार विकास शाखा प्रमुख इन्जिनियर जनक न्यौपानेका अनुसार भवन निर्माणको सम्झौतागत अवधि आर्थिक वर्ष २०८४ सम्म रहे पनि आगामी छ महिनाभित्रै काम सम्पन्न गर्ने लक्ष्य राखिएको छ।
भवन निर्माणका लागि जग्गा उपलब्ध गराउने स्वर्गीय नरबहादुर राउतकी बुहारी गोमा राउत तथा उहाँका छोराहरू नवराज, रामकृष्ण, श्यामकृष्ण र दीपक राउतलाई सार्वजनिक सेवामा पुर्याएको योगदानको कदर गर्दै सम्मान गरिएको छ।
शिलान्यास कार्यक्रममा नगरप्रमुख थापाले भवन निर्माणपछि नागरिकलाई सहज र व्यवस्थित सेवा प्रवाह गर्न सहयोग पुग्ने बताउनुभयो। उहाँले निर्माणको गुणस्तर कायम राख्न स्थानीयवासीलाई समेत निगरानी गर्न आग्रह गर्नुभयो।
नगर उपप्रमुख सरिता तिमिल्सिना भट्टराई र वडाध्यक्ष सानुकाजी कायस्थले पनि नयाँ भवनले वडाबाट प्रदान गरिने सेवा थप प्रभावकारी हुने विश्वास व्यक्त गर्नुभयो।
सूर्यविनायक नगरपालिकाका प्रमुख प्रशासकीय अधिकृत युवराज आचार्यका अनुसार नगरपालिकाका १० वडामध्ये नौवटा वडा कार्यालयका आफ्नै भवन निर्माण सम्पन्न भइसकेका छन्। सिरुटारको भवन बनेपछि सबै १० वटै वडा कार्यालय आफ्नै प्रशासनिक भवनबाट सञ्चालन हुनेछन्।
जग्गा अभावका कारण लामो समयदेखि रोकिएको वडा भवन निर्माणले गति लिएसँगै सिरुटारका नागरिकले अब थप व्यवस्थित र सहज रूपमा स्थानीय सेवा पाउने अपेक्षा गरिएको छ।
