काठमाडौँ महानगरपालिकामा बनेका भौतिक संरचना र साघुँरा बाटोका कारण आगलागी हुँदा दमकलसमेत छिर्न नसक्ने अवस्था छ । तर, यो समस्या अन्त्यका लागि काठमाडौँ महानगरपालिका वडा नम्बर २८ का वडाध्यक्ष भाइराम खड्गी निर्वाचित भएर आएदेखि नै काम गर्न थाले । अहिले दमकल छिर्न नसकेपछि आगलागी हुँदा आगो नियन्त्रणका लागि गल्ली गल्लीमा पानीको पाइप पु¥याइसकेका छन् ।
‘पानीको पाइप पु¥याइसकेको छु । आगो नियन्त्रणका लागि अब समस्या छैन,’ उनले भने, ‘सुरुबाटै यो काम गरेको हुँ ।’
उनका अनुसार अब काठमाडौं महानगरपालिकाको २८ नम्बर वडामा आगो नियन्त्रणका लागि पाइप विछ्याउने काम भइसकेको छ ।
आफूलाई काम गर्न नगरवासी र मेयर बालेन शाहको साथ र सहयोग रहेको बताएका उनले नगरवासीले आवश्यकताको सूचना दिएलगत्तै काम गर्ने गरेको बताए । ‘यहाँ ढल चाहियो, पानी चाहियो भन्ने वित्तिकै हामीले त्यहाँ पुगेर काम गर्ने गरेका छौँ,’ वडाध्यक्ष खड्गीले बताए ।
आफ्नो वडामा गुनासो नआउने गरी काम गरेको दाबी गरेका उनले नागरिकबाट कुनै पनि गुनासो नआएको बताए । दोस्रो कार्यकालमा काम गरिरहेका उनले जनताको अपेक्षा, चाहना र आवश्यकतालाई ध्यान दिएर काम गरेको बताए ।
अब वडाको आफ्नै प्रशासनिक भवन बनाउने उद्देश्यका साथ काम गरिरहेको बताए । ‘हाम्रो अहिले आफ्नै भवन बनाउने उद्देश्य लिएका छौँ,’ उनले भने, ‘चार महिनाभित्र बनाउन थाल्ने योजना छ ।’
वडाको प्रशासनिक भवनका लागि १२ आना जग्गा रहेको उनले बताए ।
राष्ट्रिय परिचयपत्र बनाउन तोकिएको स्थानमा आउन नसकेका अशक्तको बायोम्याट्रिक घरमै गएर लिने तयारी गरेको उनको भनाइ छ ।
गुनासो नआउने गरी काम गरेकै कारण विकास निर्माणदेखि सेवा प्रवाहसम्ममा नागरिकको गुनासो नआएको वडाध्यक्ष खड्गी बताउँछन् । नागरिकका प्रशासनिक कार्य झन्झटरहित र छिटो छरितो गर्ने गरेको बताउँदै उनले स्वास्थ्य, शिक्षालगायतमा पनि वडाले विशेष ध्यान दिएर काम गरेको जानकारी दिए ।
