लामो समय स्थानीय तहको निर्वाचन नहुँदा भौतिक संरचनाहरु बन्न सकेका थिएनन् । तर, २०७४ सालमा २० वर्षपछि स्थानीय तहको निर्वाचन भयो । यो सात वर्षमा केही पालिका र वडा कार्यालयहरु आफ्नै भवनबाट सेवा प्रवाह गर्न थालेका छन् । यसमध्येको एक हो, काठमाडौँ महानगरपालिकाको वडा नम्बर १६ को वडा कार्यालय । एक रोपनी चार आनामा बनेको आफ्नै नयाँ भवनमा २०८१ जेठ २६ गते सरेर सेवा प्रवाह गरेको कार्यवहाक वडाध्यक्ष पुष्प महर्जनले जानकारी दिए ।
नयाँ भवन सुविधा सम्पन्न भएकाले नागरिकका काम गर्न सकिएको उनले बताए । सेवा लिन आउँदा पहिला र्पािर्कङलगायतका असुविधा रहेको भए पनि अहिले कुनै समस्या नरहेको कार्यवहाक वडाध्यक्ष महर्जनले बताए ।
नागरिकलाई छिटोछरितो सेवा दिनु नै पहिलो दायित्वको रुपमा लिएर काम गरिरहेको जानकारी दिएका उनले सेवा लिने क्रममा कुनै समस्या आए तत्काल समाधान गरिने बताए ।
स्वास्थ्य, शिक्षा, विकास निर्माणलगायतका कार्यलाई प्राथमिकतामा राखेर काम गरिरहेको उनले बताए ।
आगामी स्थानीय तहको निर्वाचनमा टिकट पाए आफू वडाध्यक्ष पदमा उम्मेदवारी दिने उनको तयारी छ ।
