भक्तपुरको मध्यपुर थिमि नगरपालिका वडा नम्बर १ का वडाध्यक्ष बाबुकाजी डंगोलले भौतिक पूर्वाधारदेखि सामाजिक कार्यसम्मलाई प्राथमिकतामा राखेर काम गरेको जानकारी दिए । उनले धार्मिक तथा सांस्कृति सम्पदाको संरक्षण र प्रवद्र्धनको काम पनि गरेको बताए ।
‘निर्वाचित भएर आएको साढे दुई वर्षमा धार्मिक क्षेत्र अन्तर्गत राम मन्दिर, दिव्येश्वरी मन्दिर, सिद्धी गणेश मन्दिरको संरक्षण, पुनिनिर्माण गरेका छौँ,’ उनले भने, ‘सिद्धी गणेश मन्दिर र सिद्धीकाली मन्दिरको पुनर्निर्माण भएको छ । दिव्येश्वरी मन्दिरको दायँबायाँको पाटीहरुको पुनर्निर्माण भइरहेको छ ।’
पर्यटन विकासका लागि विभिन्न स्थानमा पार्क बनाउनेदेखि आवश्यक पूर्वाधार निर्माणलाई प्राथमिकता दिएर काम गरेको उनले बताए । उनका अनुसार पर्यटकलाई लक्षित गरी १ नम्बर वडामा होटेल, होमस्टे पनि सञ्चालन गरिएको छ । बाह्य र आन्तरिक पर्यटक भित्र्याउने गरी काम गरेको उनले बताए ।
विनियोजित बजेट सदुपयोग गर्नेगरी सडक निर्माण पनि भइरहेको जानकारी दिएका उनले सडक विस्तारमा भने चुनौती देखिएको छ । साँधको विवादितले पनि केही विकास निर्माणका काममा अवरोध भएको उनको भनाइ छ ।
वडाले गरेका काम र वडाबाट प्रवाह भएको सेवालाई लिएर आएका सेवाग्राहीको गुनासो तत्कालै सम्बोधन गर्ने गरेको जानकारी दिएका वडाध्यक्ष डंगोलले वडाबाट सम्बोधन हुने गुनासोलाई तत्कालै गरिदिने गरेको बताए । वडाबाट समाधान नहुने गुनासोलाई यसबारे सेवाग्राहीलाई बुझाएर पठाउने गरेको उनले बताए ।
