काठमाडौँ महानगरपालिकाको वडा नम्बर २९ का वडाध्यक्ष कुश ढकालले सरकारी संयन्त्रबीच प्रभावकारी समन्वय नहुँदा आफूले राम्रो काम गर्न नसकेको र सन्तुष्ट पनि हुन नसकेको बताएका छन् ।
‘जनप्रतिनिधि नहुँदाभन्दा त अहिले जनप्रतिनिधि छ भन्ने विश्वास छ । तर, म सन्तुष्ट छैन, आफ्नो कामबाट । मैले राम्रो काम गर्न सकेको छैन,’ उनले भने, मैले किन राम्रो काम गर्न सकेको छैन भने काठमाडौँ देशकै राजधानी हो । आज मैले बाटो बनाएँ भने भोलि अर्काे भत्काइदिन्छ, पर्सी अर्काे खन्छ । अस्ति भर्खर पिच गरेको ४÷५ ठाउँमा भत्काइसकेको छ । यहाँ ५÷६ वटा सरकार बस्छ ।’
आफ्नो ७ वर्षे कार्यानुभवमा देश चलाउन राज्यका संयन्त्र, विधि र पद्धति बलियो हुनुपर्ने बुझेको भन्दै उनले विधि पद्धति राम्रो नभएकाले नतिजा राम्रो ल्याउन नुसकिने बताए ।
जबसम्म विधि र पद्धतिमा देश बढ्दैन तबसम्म राम्रो काम गर्न नसकिने उनको बुझाइ छ । ‘विधि पद्धति राम्रो नहुँदा अहिले जसलाई जसरी मन लागेको छ, त्यसरी चलेको छ । आफ्नैमात्र वास्ता गरेको छ,’ उनले भने, ‘समाजलाई मजबुद बनाउनुपर्छ । वडालाई मजबुद बनाउनु पर्छ । सरकारलाई मजबुद बनाउनुपर्छ भन्ने कसैलाई पनि छैन । देशको माया कसैलाई छैन ।’
व्यक्तिले होइन लोकतान्त्रिक विधि र पद्धतिले राम्रो गर्ने भन्दै उनले भने, ‘अहिले व्यक्ति भर्सेस लोकतन्त्र कुरा आइरहेको छ । लोकतन्त्र खराब व्यक्ति ठिक हो भने व्यक्तिमा गए भइहाल्यो नि । राजालाई ल्याए भइहाल्यो नि । किन चाहियो अरु व्यक्ति हामीलाई, पृथ्वीनारायणको सन्तान पनि हो । व्यक्तिका कुरा नगरौँ, विधिबाट अगाडि बढौँ । बालेन्द्र शाह पनि आएपछि काठमाडौँ महानगर विधिबाट अघि बढेको छ त ? विधि र पद्धतिबाट जानुपर्यो ।’
तीन किसिमका विकास हुने भन्दै वडाध्यक्ष ढकालले भने, ‘टालटुले विकास, अल्पकालीन विकास र दीर्घकालीन विकास, तीनखाले विकास हुन्छ । अहिले काठमाडौँ महानगरमा टालटुले विकास भएको छ ।’
राज्यका संयन्त्रबीच एउटाले काम गर्न खोज्यो अर्काेले रोक्ने प्रवत्ति रहेको भन्दै विधि र पद्धतिअनुसार विकासदेखि हरेक क्षेत्रमा मापदण्ड बनाएर काम गरेमा मात्र देश समृद्ध बन्ने आफ्नो बुझाइ रहेको उनको भनाइ छ ।
