काठमाडौँ महानगरपालिका वडा नम्बर १२ का वडाध्यक्ष बालकृष्ण महर्जनले आफ्नो वडाभित्र बहाल, चोक तथा पाटीपौवा बनाउने कार्य अन्तिम चरणमा पुगेको बताएका छन् । पुरानो सम्पदाअनुसार नै काठ र झिंगटीको प्रयोग गरेर बनाउने कार्य भइरहेको उनको भनाइ छ ।
बाटो तथा ढल व्यवस्थापनको कार्य पनि भइरहेको जानकारी दिएका उनले करिब १५ हजार जनसंख्या यस वडामा रहेका र कुनै समस्या पनि नरहेको बताए । ‘मेरो वडामा करिब १५ हजार जनसंख्या छन् । बाटो, ढलको काम भइरहेको छ । अहिले त्यस्तो कुनै समस्या छैन,’ उनले भने ।
काठमाडौँ महानगरको वातावरण समिति संयोजकसमेत रहेका वडाध्यक्ष महर्जनले धार्मिक, ऐतिहासिक, पर्यटकीय क्षेत्रके संरक्षण र प्रवद्र्धन गर्दै विकास निर्माणको कार्यलाई प्राथमिकता दिएर काम गरेको बताए ।
२०७४ सालको निर्वाचनमा ८० मतले पराजित भएका उनी २०७९ को चुनावमा एक हजार १६९ मतले विजयी भएर वडाको नेतृत्व गरेका हुन् ।
आफ्नो मूल उद्देश्य भनेको वडावासीलाई सुशासन दिने रहेको बताएका उनले सर्वसुलभ सेवा प्रवाहलाई प्राथमिकता राखेर जनताको सेवा गरिरहेको बताए ।
काम गर्ने क्रममा कुनै कमिकमजोरी भए आफूलाई जानकारी दिन वडावासीसँग आह्वान गर्ने गरेका उनले जनताबाट गुनासो त्यत्ति नआउने गरेको बताए ।
चुनावका बेला जनतमाझ गरेको २० बुँदे प्रतिबद्धताअनुसार लगभग सबै सकिएको उनको भनाइ छ ।
