काठमाडौँ महानगरपालिकाको वडा नम्बर २१ का वडाध्यक्ष उदयचुडामणि बज्राचार्यले खानेपानीको समस्या समाधान गरेको जानकारी दिएका छन् ।
आफ्नो वडामा खानेपानीको समस्या नरहेको बताउँदै उनले ढल व्यवस्थाको समस्या समाधानमा आफूले ध्यान दिएको बताए । ‘ढल जाम हुने समस्या छ । यसको समाधानका लागि काम गरिरहेको छु,’ उनले भने ।
दोस्रो कार्यकालमा रहेका उनले अघिल्लो कार्यकालका बाँकी काम सम्पन्न गर्ने कार्य भइरहेको बताए । यस वडामा नयाँ संरचना बनाउनुपर्ने अवस्था नरहेको भन्दै उनले बनाइसकेका संरचनाको संरक्षण र सुधार मात्र गर्नुपर्ने बताए ।
आफ्नै कार्यकालमै वडा कार्यालयको भवन पुनर्निर्माण गरेर सुविधा सम्पन्न बनाएको उनले बताए । चुनावका बेला जनतामाझ आफूले कुनै प्रतिबद्धता नजनाएको भन्दै उनले अहिले वडाले पाएको बजेटअनुसार काम गर्नेगरेको जानकारी दिए । बाँकी रहेको कार्यकालमा देखिएका समस्या समाधान गर्ने र भएका सम्पदा र भौतिक पूर्वाधारका संरचनाको संरक्षण गरिने उनले बताए ।
स्वास्थ्य तथा शिक्षा क्षेत्रमा पनि आवश्यक काम भइरहेको उनको भनाइ ।
