काठमाडौं । जलविद्युत् कम्पनीका सेयरधनीका लागि लाभांशको खबर आएको छ । गत आर्थिक वर्ष २०८२/८३ को नाफाबाट तीनवटा हाइड्रोपावर कम्पनीले सेयरधनीलाई नगद लाभांश वितरण गर्ने प्रस्ताव गरेका छन् ।
हिल्टन हाइड्रो इनर्जी, आशुतोष इनर्जी र काबेली हाइड्रोपावरले क्रमशः २० प्रतिशत, १८.९४ प्रतिशत र १६.३१ प्रतिशत नगद लाभांश वितरण गर्ने प्रस्ताव गरेका हुन् । प्रस्तावित लाभांशमा करसमेत समावेश छ ।
तीनवटै कम्पनीले लाभांश पारित गर्न भदौ २७ गते वार्षिक साधारणसभा बोलाएका छन् । आशुतोष इनर्जीको सभा ललितपुरको कुपन्डोलस्थित होटल हिमालयमा हुनेछ भने हिल्टन हाइड्रो इनर्जी र काबेली हाइड्रोपावरले काठमाडौंको नयाँ बानेश्वरस्थित द एभरेस्ट होटलमा सभा गर्नेछन् ।
लाभांशसँगै कम्पनीका साधारणसभामा ऋण अनुमोदन, विभिन्न जलविद्युत् आयोजना तथा कम्पनीमा लगानी गर्ने प्रस्तावसमेत पेस हुँदैछन् ।
यसैगरी आर्थिक वर्ष २०८२/८३ को वार्षिक प्रतिवेदन र लेखापरीक्षकको प्रतिवेदन पारित गर्ने तथा चालु आर्थिक वर्षका लागि बाह्य लेखापरीक्षक नियुक्त गर्ने प्रस्ताव पनि सभामा राखिनेछ ।
