म्याग्दी । लामो समयदेखि निर्माणको प्रतीक्षामा रहेको म्याग्दीको ४० मेगावाट क्षमताको राहुघाट जलविद्युत् आयोजना अब विद्युत् उत्पादनको चरणमा पुगेको छ ।
नेपाल विद्युत् प्राधिकरणको सहायक कम्पनी रघुगंगा हाइड्रोपावरले प्रवर्द्धन गरेको आयोजनाको भौतिक निर्माण तथा उपकरण जडानको काम पूरा भइसकेको छ । आयोजनाका बाँध, डिसेन्डर, सुरुङ र स्विचयार्डको परीक्षणसमेत सफल भएको छ ।
आयोजनाको २० मेगावाट क्षमताको एउटा युनिटको परीक्षण पूरा भइसकेको छ भने अर्को युनिटको परीक्षण सुरु भएको छ । परीक्षण प्रक्रिया सकिएपछि विद्युत् उत्पादन सुरु गर्ने तयारी गरिएको रघुगंगा हाइड्रोपावरका प्रबन्ध सञ्चालक गणेश केसीले बताएका छन् ।
आयोजनाबाट वार्षिक २४ करोड ५ लाख ९३ हजार ३४ युनिट विद्युत् उत्पादन गर्ने लक्ष्य राखिएको छ । उत्पादित विद्युत् कालीगण्डकी करिडोरअन्तर्गतको २२० केभी दाना–कुश्मा प्रसारण लाइनमा जोडिनेछ ।
राहुघाट निर्माणमा भने समय र लागत दुवै चुनौती बने । कोरोना महामारी, बाढीपहिरो, निर्माण सामग्रीको अभाव तथा ठेकेदार परिवर्तनका कारण आयोजना लामो समय प्रभावित भयो ।
सिभिल निर्माणका लागि भारतीय कम्पनी जयप्रकाश एसोसियट्ससँग ६ अर्ब रुपैयाँमा ठेक्का सम्झौता गरिएको थियो । यसअघि पुरानो ठेकेदारसँगको सम्झौता तोडिएपछि नयाँ प्रक्रियामार्फत निर्माण अघि बढाइएको थियो ।
इलेक्ट्रोमेकानिकलतर्फ भारत हेभी इलेक्ट्रिकल्स लिमिटेडसँग सम्झौता गरिएको थियो । आयोजना भारतीय एक्जिम बैंकको सहुलियतपूर्ण ऋण तथा नेपाल विद्युत् प्राधिकरण र नेपाल सरकारको संयुक्त लगानीमा निर्माण भएको हो ।
म्याग्दी उद्योग वाणिज्य संघका अध्यक्ष सुविन श्रेष्ठले राहुघाटलाई जिल्लाको जलविद्युत् विकासको ‘गेटवे’का रूपमा लिइएको बताएका छन् । दुई दशक लामो प्रतीक्षापछि आयोजना उत्पादनमा जान लाग्दा जिल्लावासी उत्साहित भएको उनको भनाइ छ।
