काठमाडौं । रास्वपा सांसद रञ्जु दर्शनाले कक्षा १२ सम्म यौन शिक्षा अनिवार्य गर्न प्रस्ताव गरेकी छन् । सोमबार प्रतिनिधिसभा बैठकमा बोल्दै उनले कक्षा १ देखि १२ सम्म यौन शिक्षा अनिवार्य गर्न मौखिक प्रस्ताव गरेकी हुन् ।
गरिमा चौधरीसहित बलात्कार, हत्यासहित महिला हिंसाको घटनाबारे धारणा राख्दै उनले दुईवटा विषयमा सदन र सरकारको ध्यानाकर्षण गराइन् ।
‘पाठ्यक्रमहरुमा विद्यालयमा कम्प्रेहेन्सिभ सेक्सुआलिटी एजुकेसन कक्षा १ देखि १२ सम्म अनिवार्य गरियोस् । हामी सधैभरि सेक्स एजुकेसन भन्ने बित्तिकै मुख फर्काउँछौँ, त्यो हटाइयोस्,’ उनले भनिन्, ‘हाम्रो फरेन्सिक क्यापासिटी कति छ, त्यसलाई वृद्धि गरियोस् । घटनास्थलमा जो प्रहरीहरु पुग्नुहुन्छ, उहाँहरुको क्यापासिटी बिल्डिङमा नेपाल सरकारले काम गरोस् ।’
आफू सांसदसँगै एक आमाको हैसियतमा पनि बोलिरहेको भन्दै उनले गरिमाको परिवारलाई न्याय दिन सरकारले गरेको पहलप्रति आभार व्यक्त गरिन् ।
चलचित्रदेखि कथाहरुमा छोरीलाई चित्रण गरिने विषयलाई लिएर उनले भनिन्, ‘छोरीलाई जबसम्म ‘सेक्स अबजेक्ट’ को रुपमा एडभरटाइजमेन्टमा, स्टोरीमा, फिल्ममा दर्शाइन्छ, तबसम्म कोही पनि सुरक्षित रहँदैनन् ।’
